Erdwurms

Yuk!  Ek gril vir goete.  En om aan ‘n erdwurm te vat is soos om met ‘n seekat te wals – al te grillerig.

Tog het die konsep van vermiculture/vermikultuur my belangstelling geprikkel, en ek het gesoek na wurms tot ek gekry het. 

Daar is mense wat beweer dat ‘dooie gronde’ weer lewe kan kry as jy van hierdie erdwurms daarin vestig. 

Ek het ongelukkig ‘n onwettige immigrant in die vorm van ‘n hadeda wat met sy lang snawel kom grawe vir wurms, daarom sal ek darem nie sommer derduisende erdwurms op my agterplasie loslaat nie.  Daardie hadeda bevlieg die katte, en kyk my nogal skuins aan as ek hom verwilder.  Destyds toe ek my wurmplaas begin het, was dit teen 30c per wurm.  Verbeel jou as ek moet begin somme maak elke keer as ek sien die hadeda kap sy snawel in my grasperk in!

Ai, ek het soos met my vistenk jare terug, na werk tog te gretig die bin nadergetrek om my agtermiddag tee by my wurms te geniet.  Wat ‘n absolute teleurstelling!  Sodra die deksel gelig word, koes die wurms soos ‘n klomp kroeks wat wegkruip vir die polisie!  Die enkele rebel wurm teen die kant, want nie gou genoeg die skuiling kon kry teen die skielike lig nie, dans blind-blind rond, en weet nie wat is op, en wat is af nie.

Tot ek eendag met hare wat pen-orent staan, my hande in die bin ingewerk het, en ‘n handvol wurms en wurm huis uitgetel het…  Deur my grille het dit wat ek gesien het, my verstom.  Krieoelende wurms, en feitlik geen teken van die aanvanklike koerantpapier skeursels wat hulle huis se fondasie was nie.  Hulle het alles verwerk!!!  En oral was piepklein wurms besig om te skarrel op my hand.  En klein, ronde eiertjies het soos diamante geskitter.  Die grille was die moeite werd.  Ek het bewyse gehad dat my wurms gelukkig is, aanteel, en my nie net geld gekos het nie.

Onder-in die tweede bin, was vloeistof aan’t klots as ek die bins skud, wat beteken het dat ek ‘n ‘full producing worm farm’ onder my tafel gehad het!  Die vloeistof is plante toe.  Beter bekend as ‘wurm tee’.

Ek daag jou uit om op klein skaal jou eie wurmplaas te begin.  Die bins is klein genoeg om onder die bed te staan.  Daar is GEEN slegte reuke wat jou slapelose nagte sal gee nie, en jy kan die kompos wat gemaak word in jou bin, gebruik vir ‘n potplant, ‘n groente-in-‘n-pot, of buite in jou tuin.  Dieselfde met die wurm tee – hierdie nutrientryke vloeistof is uitstekende voeding vir huisplante, potplante of groentes.

‘n Fantastiese geskenk vir jou kinders, om hulle te leer van die prosesse van die natuur.  Dink net hoeveel pret die hele gesin kan kry uit hierdie leerkurwe.  Dit is minimale werk.  Ek gee nie meer as elke 2 weke kos nie – en dit bestaan uit pampoen of butternut, of soms gaar, afgekoelde mieliepap.  Mieliepap maak die spul vreeslik bronstig, en voor jy jou oe kan uitvee, is jou wurms dubbel in getal!

Gaan lees verder op www.vermiculture.wordpress vir meer praktiese wenke, of plaas vandag nog jou bestelling vir ‘n 2-bin produserende wurmplaas.  Die volgende plase sal teen die tweede week in Desember 2009 gereed wees vir verspreiding.

Koerierdienste na buurdorpe van Stellenbosch is beskikbaar, anders kan jy dit self kom afhaal.  Die koste vir ‘n bin met gevestigde wurms is op hierdie stadium R350.  Ek glo om die kostes laag te hou, sodat mense kan speel en eksperimenteer voordat jy R1000 mors en nie regtig belangstelling in jou nuwe stokperdjie het nie.

Enige vrae of navrae kan gestuur word na vermiculture@gmail.com of aardkind@gmail.com

Kry jou wurms vandag, en begin jou carbon footprint neutraliseer!